ഷംസ്,നീ എവിടെയാണ്?

അന്തി ചക്രവാളത്തില്‍ സൂര്യന്‍
അസ്തമിച്ച് കഴിഞ്ഞാല്‍,
പ്രഭാതത്തില്‍ വീണ്ടും ഉദിച്ചുയരും....
പക്ഷെ,നീ എവിടെയാണ് ഷംസ്?

ഇതുവരെയും നീ തിരിച്ചു വന്നില്ലല്ലോ!
ഞങ്ങളുടെ അലസമായ പകലുകള്‍ക്ക്
ഉന്മേഷത്തിന്‍റെ പ്രകാശം ചൊരിയാനായ്
നീ ഇനിയുമെന്തേ ഉയര്‍ന്നു വന്നില്ല?



മുഖം നിറയെ പുഞ്ചിരിയുടെ പ്രകാശവുമായ്
ഞങ്ങള്‍ക്കിടയില്‍ ഓടി നടന്നിരുന്ന നീ,
സര്‍വ്വശക്തന്‍റെ പരീക്ഷണങ്ങളില്‍ അകപ്പെട്ടപ്പോള്‍
തളരാത്ത മനസുമായി,
പുഞ്ചിരിയുടെ പ്രകാശം വിടര്‍ത്തിയ നീ,
നീ എവിടെയാണ് ഷംസ്?

ഏതു കാര്‍മേഘങ്ങളാണ് നിന്നെ മറച്ച് വെച്ചിരിക്കുന്നത്?
ഏതു പാതാളത്തടങ്കലിലാണ് നീ അകപ്പെട്ട് പോയിരിക്കുന്നത്?

ഞങ്ങള്‍,
ഒരു നാടും,ജനതയും,
ഓരോ മണല്‍ തരിയും,ഓരോ മനസും
മുകളിലേക്കുയര്‍ത്തിയ കൈകളോടും,
നിറക്കണ്ണുകളോടും കൂടി
മനസ്സ് നിറയെ പ്രാര്‍ത്ഥനയുമായി കാത്തിരിക്കുന്നു;
ഞങ്ങള്‍ക്ക്‌ വീണ്ടുമൊരു
പുഞ്ചിരിയുടെ പ്രഭാതം സമ്മാനിക്കാനായി
ഞങ്ങളുടെ ഷംസ് വീണ്ടും ഉദിച്ചുയരാതിരികില്ല
എന്ന പ്രതീക്ഷയോടെ......


(ഷംസു,  അടുത്ത ബന്ധു എന്നതിനപ്പുറം ആത്മാര്‍ത്ഥ സുഹൃത്തായിരുന്നു എനിക്ക്.ഒരു സുപ്രഭാതത്തില്‍ ആരോടും ഒന്നും പറയാതെ മുംബായിലെ തെരുവിലെവിടെയോ ഞങ്ങളില്‍ തീരാ വേദന മാത്രം ബാക്കിയാക്കി   അവന്‍ അപ്രത്യക്ഷനായി.എവിടെയാണെന്ന് അറിയില്ലെങ്കിലും ഷംസുവിന് വേണ്ടിയുള്ള കാത്തിരിപ്പ്‌ ഇനിയും ഞങ്ങള്‍ അവസാനിപ്പിച്ചിട്ടില്ല.)